冬日下為拾荒婆婆送上窩心熱咖啡　大埔善心谷友：幫人不用怕醜

喝一杯咖啡對上班族來說可能平常不過，但對部分人來說可能足以窩心一整天。有大埔谷友在佐敦街邊看見一位拾紙皮婆婆在寒冬下只有一包餅乾充飢，於是主動上前查問有何可幫忙，最後為婆婆送上一杯熱咖啡，令婆婆笑逐顏開。

大埔谷友Jennifer 日前分享助人經歷，她在佐敦遇上一位婆婆在街邊整理紙皮，期間婆拿出一包餅乾充飢，Jennifer擔心婆婆不夠飽，於是主動上前問婆婆有何需要，問婆婆是否需要買其他食物給她。於是婆婆答「你買杯咖啡俾我飲啦！」

最後Jennifer買了一個雞飽、粟米杯及一杯咖啡給婆婆。婆婆亦食得開心滿足。

及後Jennifer再分享與婆婆聊天對話，指婆婆的紙皮車仔上有拐仗，估計她行動不便，問婆婆「有無錢使」，婆婆僅就有生果金，當她再追問婆婆「夠唔夠使」，婆婆已靜下來默不作聲。

Jennifer指，曾想過給現金婆婆，但怕此舉動令婆婆心難受。她又指，原來對我們來說普普通通的一杯咖啡，對婆婆來說卻係奢侈品，令她很心酸。

Jennifer向TOPick指，分享故事的目的是鼓勵香港人，幫人不用怕醜，勇敢踏前一步：「受助的人安慰，助人的又安心。宣揚互助互愛精神，讓愛漫延。」

【想飲咖啡的執紙皮婆婆👵】

地點：佐敦

前幾日番學前自己又走左去尖沙咀食素，好好味，見仲有時間，行去附近佐敦間麥當當打下"等"先。
離開時，我一步出門口，見到對外有個婆婆整理紙皮。我其實趕時間要走，但都企埋一邊觀察下婆婆有無野要幫。我睇左一陣，婆婆拎刀出黎開包餅黎食，得個幾片薄切切餅乾，心諗邊食得飽架？! 我忍唔住喇……

🌻：婆婆，你使唔使我幫你搬啲紙皮上車？
👵：唔使，我再疊好啲先。
🌻：婆婆，你食呢幾塊餅唔飽架，天氣又凍❄。你肚唔肚餓呀？我買野俾你食好嗎？
👵：你買杯咖啡俾我飲啦!（婆婆應該好耐無飲過咖啡，我feel到佢真係好想飲杯熱咖啡）
🌻：咖啡？你鍾意飲咖啡，好丫，我買多個飽俾你食啦，你鍾意食牛飽，豬飽，魚飽定雞飽呀？
👵：有雞飽架咩？
🌻：有呀!我買雞飽你食啦！（婆婆聽到雞飽好開心，應該以為係中式個啲雞飽仔）

最後，我揀左老人家岩食無炸嘅雞飽，粟米杯，同香濃咖啡。

問左婆婆佢可唔可以飲甜野，幫佢落一包糖，婆婆食得開心滿足，我也去番學了。

天寒地冬，我見婆婆架車仔綁住支拐仗，佢應該都行動不便。

我問左婆婆有無錢使，婆婆話有生果金，我問婆婆夠唔夠使，婆婆無答。我想俾啲啲錢婆婆用，但我唔敢，唔知俾錢嘅舉動會否令婆婆個心難受。

我心諗我幫唔到太多，只能幫到呢度咋。

對我們來說普普通通嘅一杯咖啡對婆婆來說卻係奢侈品心很酸。

臨走，婆婆讚我乖同靚女，嘩，婆婆真好人讚美我

走時都係依依不捨，回頭再望下婆婆，我倆再笑著揮手道別，願婆婆平安健康。